Lei miraus infidèus

Resumat

Son paire se rasava au cotèu grand, coide levat, en cantant la Traviata. Lo talh ne preniá un ritme de valsa e l’escuma blanca, a dicha que se gonflava sus la lama, evocava la crinolina. Eu, lo fiu, se conservava de l’adolescéncia lo repertòri dei Beatles. One, two, three, four..., lo rasador de plastica davalava la gauta a sautets e la quitava tot blanc escrumós dins l’emfasi d’un I love you.

Son paire, de còps se talhava coma se fai un faus pas, lo sang perlejava e la maire portava la fiòla de tres-sièis. Eu, per pas s’entalhar, deviá faire avís a la verruga qu’aviá au còu, aquí que s’acaba lo peu, e que vesiá pas bèn, un pauc detràs qu’èra, a senèstra. Abordava l’endrech lentament e en retenènt lo cant.

Robèrt August Cesar Lafont (Robert Lafont en francés) (Nimes, 1923 - Florença, Itàlia, 2009) èra un intellectuau occitan e pus particularament un lingüista, un escrivan, un istorian, un especialista de la literatura e un teorician politic. Es una dei pus grandei figuras istoricas de l’occitanisme.