Los uelhs sus terra

Resumat

Benedicta Bonnet : nascuda en 1964, d’una familha d’agricultors de Sent-Alari prep de Neiçon. Après lo liceu de Sent-Ireis e un DEUG a la Facultat de Sciéncias Umanas de Lemòtges, a dietz-e-nòu ans es “montada” trabalhar a París.

Tornada au país au bot de dietz ans, en 1993, a tornat trobar au còp, la natura, lo mitan rurau, e la lenga de son enfança.

Quo es la chucada d’una sensibilitat esmiraudiada davant lo país aimat, los remembres de l’enfança enquera pròcha, la vita que se drueba, que s’exprimen dins los poemas e los corts textes de pròsa recampats per lo prumier còp dins queu recuelh.

Los prumiers son pareguts dins la revuda La Clau lemosina en 1999. Presentats au concors “Escriure en lenga d’òc” organisat per Leis Amics de Mesclum a Nimes lo 20 de mai 2000, an vaugut a l’autor la tresesma plaça dau Premi Jòrge Rebol.