Las set Filhas dau Diable ETLBD. : Contes d’ier a doman (libre + 2 CD)

Resumat

22 Après Grizzly-John (1997) e La Fada multicarta (2011), veiquí un noveu recuelh de vinta-e-dos contes de Micheu Chapduelh.

12 contes « de prumiera man » pareguts dins Lo Leberaubre o Paraulas de Novelum, contes de las tonalitats plan diversas e que – levat La Peu d’Anna – an res a veire emb la tradicion.
Enquera que…

4 contes collectats a bocins, traucats, frenits, eissicats, que l’enveja prenguet au contaire de los sarcir, petaçar e quitament brodar a son biais. Quilhs contes demòran daus contes dau temps daus contes, que duret la tota prumiera meitat de l’eternitat, mas los petaçons ne’n son de totas las colors : fantastic, comic, burlesque, satiric, erotic…

6 contes « persistents », contes de tradicion populara que l’autor lor faguet subir un tractament radicau. Qué voletz, per entrar dins la segonda meitat de l’eternitat, per qu’un conte d’ier venha un conte de benleu-doman, lo Prince-pasmai-prince deu ben obténer lo consentiment de la Bela endurmida, Cuol Cendrós a ben lo drech de comandar baskets e converses sus Amazon…

7 En mai dau texte, per los que an pas la chança d’auvir Micheu Chapduelh sus scena, « lo fin contaire » enregistret una chausida de set contes per fin tanben de far auvir la lenga dins sa varianta lemosina de Perigòrd.

2 Avetz aquí dos CD de mai de doàs oras de bona lenga, de segur pas coma un vertadier espectacle vivent, mas totparier plan plasent per los amators de contes e plan utile per los que aprenen l’occitan.

1 libre mai dos CD, un bon biais de segre la vita daus contes, de ier a benleu doman.

*ETLBD : E Tot Lo Demai

Micheu Chapduelh es nascut en 1947 a Agonac, comuna de Perigòrd, e ten l’occitan de familha. Professor de francés e d’occitan, es tanben plan implicat dins lo domeni associatiu e contribuet a la creacion de l’ASCO de Sarlat e de Novelum IEO Perigòrd, que ne’n fuguet tanben l’un daus presidents. Son òbra literària richa d’autor poligrafe embraça la poësia, lo roman, los contes, l’etnografia, las cronicas, las paraulas de chançons per Joan-Pau Verdier e Peiraguda, los estudis, la participacion a de las revudas, en occitan, en francés…

Fuguet tanben co-editor de la revuda « Lo Leberaubre ». Reçaubet en 2013 lo Grand Prix Périgord per son libre J’ai refermé mon couteau editat d’en prumier au Chamin de Sent-Jaume de Jan dau Melhau. Òme de scena, l’escrivan ceda la plaça au « fin contaire » e fai partatjar son gost per lo fantastic e l’umor en un espectacle plan viu.