Gramatica occitana (Segonda edicion)

Résumé

« Se vòls reconquistar l'empèri de ta lenga », coma disiá lo grand Mistral dins un poèma del 7 d'octobre de 1878, aquesta Gramatica occitana es per tu. Totes los occitans, de la Gasconha a las “valadas” occitanas d'Itàlia e del Lemosin a la Val d'Aran an plan rason d'aimar lor occitan local, de lo parlar e de l'escriure : l'occitan es una lenga ont totas las fòrmas localas son estimadas bonas e respectablas.

Mas quò empacha pas que la lenga de Frederic Mistral e de Joan Bodon a una fòrma estandard, coma totas las lengas de cultura del mond, a costat dels parlars locals. E tota persona que sap un occitan local compren l'estandard sense pena.

Aqueste libre es una de las gramaticas de l'occitan estandard.

Jacme Taupiac

[...] Jacme Taupiac a servat de la primièra edicion de capítols sintetics, sus una sola pagina, que pòdon èsser assimilats pels escolans  (d'adolescents, mas tanben de mai vièlhs) e que pòdon aisidament tornar trobar. Las explicacions son pro complètas mas accessiblas a un public larg, ambe d'exemples revirats en francés per qu'aqueles qu'an pas encara integrat pro de vocabulari sián pas perduts. Una novetat de l'edicion son los exercicis prepausats, precioses pels estudiants que serián pas ajudats per un ensenhaire.

En mai d'aquò, Jacme Taupiac prepausa d'explicacions aprigondidas sus la grafia. [...]

Prefacia de Emmanuèl Isopet
Agregat d'occitan
President de l'Associacion Antonin Perbòsc, Seccion departementala del Tarn e Garona de l'Institut d'Estudis Occitans