PERFUM DE MON PAIS

Résumé

N'occitan s'adreiça a d'autres occitans, e, d'en prumier, a tots los Lemosins que se fan un onor de parlar o d'escrir la linga de lors ancessors. Lo recuèlh de poemas que vos es presentat es fach avant tot per glorificar nòstre país. Podretz remarcar la granda varietat de las fòrmas que van dau sonet lo pus classic aus vèrs de diversas mesuras, ni rimats ni mai assonanciats. La libertat guida ma pluma. Vòle escrir mas chançons coma quò me platz. Sei pas dispausat per imitar l'escòlas literarias daus Francimands que venen de mai en mai destimborlats a mesura que lo temps passa. La pus granda part de las chançons que troberetz dins queu libret fugueren compausadas li a bien dau temps, dins la prima de ma vita, puèi adobadas de per aprèp.
Los temas son quilhs de la poesia champestra e populara : l'encantament de las sasons, los chants daus pastors, la vita dau brave monde de nòstres vilatges, la prima, l'estiu, las brujas, los estancs e los bòscs; Lo titre dau recuèlh n'en ditz l'unitat : "Perfum de mon País".
Auriá milher fach de dire "los perfums", quilhs de las forests e de las flors sauvatjas, daus prats au mes de junh, de las terras lauradas au moment de bladar, daus chastanhs molhats per la plueja de la darrièra.
L'autor pòt pas oblidar qu'eu es dau meseis temps un militant occitan e que la decadencia e la mòrt lenta dau terraire li fan degreu. Sabem ben que lo temps passat tornará pas. Damandem pas au Lemosin dau sègle passat de tornar viure : ni aviá trop de miseria. Mas vodriam veire ribar chas nos la prosperitat daus temps noveus, e que lo monde aguessan pas besuenh de partir au luenh per trobar a ganhar lor vita. Vodriam que nòstra linga mairala fuguessa ensenhada dins l'escòlas a tots los niveus. Trobaretz donc dins quel obratge daus poemas que chanten los planhs e l'amaresa daus eisilhats. Mas, coma de rason, lo libre s'achaba per un imne d'esper e de confiança.
Es pas pensable de laissar perir entau na linga e na cultura.
Andriu Manhon

Revuda La Clau lemosina Suplement
Autor : Manhon, Andriu
Linga : Occitan (lemosin)
Parucion : 12/1977
Editor : CLEO
Nb de pajas : 66
Format : 14,5 x 21 cm
Pés : 94 g
ISSN : 03396487